Jæja þá. Nú hefur bloggið fengið nýjan titil. Þann fjórða í röðinni sem fylgir á eftir Gústu í Glasgow, Bústnu í Bristol og Ágú í Aberdeen - Kankvís í Cambridge, er það ekki bara ágætis titill?

Ég er semsagt flutt til Cambridge, flutti frá Aberdeen með brostið hjarta en þó ekki brotið. "Ei vitkast sá er aldrei verður hryggur" o.s.frv.

Hér eru myndir af nýja húsinu mínu. Ég flutti inn á hana Ástu Björk og það fer mjög vel um mig. Hér fylgja líka myndir af nýja farskjótanum sem ég fjárfesti í og nú efni ég til nafnasamkeppni ... hvað á hjólið að heita??

Ég snarast á því á morgnanna á bókasafn forleifafræðideildarinnar við Cambridge háskóla þar sem mér var vel tekið og gefið bókasafnskort sem gildir fram að jólum. Bókasafnið er gamalt, þar er hátt til lofts og svalir allt í kring og niðri sit ég við stórt eikarborð og skrifa og endurskrifa og skrifa og endurskrifa.

Ég leyfi ykkur að fylgjast með hvernig gengur og vonandi á nú eitthvað sérlega spennandi og skemmtilegt eftir að drífa á daga mína hér á suðaustur Englandi.

Munið eftir nafnasamkeppninni!