Það var yndislegt að vera í Frakklandi þar sem brauðbíllinn flautaði á bæjarhlaðinu hvern dag um hádegisbil og fiskibíllinn á föstudögum, með ferskan krækling og ostrur. Ég lifði svokölluðu lúxus lífi í heilar þrjár vikur. Flesta daga las ég undir tré, baðaði mig í sundlaug og sól og drakk svo rauðvín undir stjörnunum. Ég fór líka í langar hjólaferðir um sólblómaakra, tvisvar sinnum sigldi ég á kanó og svo tók ég þátt í einni matreiðslukeppni (ég tapaði en bara með einu stigi sem er merkilegt því ég þurfti að versla ein í laumi í franskri búð sem er hægara sagt en gert). Afmælisveislan fór vel fram, jazz hljómsveit spilaði undir dansi svo það var hvorki þörf fyrir pott né sleif og þaðan af síður íslenskar drykkjuvísur.