Þegar ég byrjaði í skólanum hérna þá var mér sagt að ég þyrfti að huga að PDP - inu mínu og mér var gefin mappa með allskyns gröfum, súluritum og eyðublöðum. PDP gæti útlagst PÞP á íslensku eða persónu þróunar plan. Ég þarf því samhliða rannsókninni minni að þróa persónu mína til að gera mig að eftirsóknarverðari vinnukrafti. Árlega þarf ég svo að sýna fram á að ég hafi gefið persónu þróun minni gaum með því að hafa farið á allskyns námsskeið. Það er skemmst frá því að segja að ég stóð mig ekki í stykkinu síðasta vetur og er því vanþróaðari en æskilegt þykir. Í gær hysjaði ég því upp um mig gammosíurnar og buxurnar og fór á námskeið í rannsóknar strategíu. Eftir því sem ég komst næst var þetta námskeið um hvernig maður á að markaðssetja sjálfan sig til að verða virtur og ríkur. Ein leiðin til að ná því (eftirsóknaverða?) takmarki er að "networka" (isk. vefja?) og það sem meira er ég á að eyða 10% af tíma mínum í svoleiðis framapot, 80% í rannsóknarvinnu og 10% í að fara á námskeið. Mér finnst með eindæmum leiðinlegt að networka og vil heldur tala við fólk sem ég þekki en ókunnuga og því féll mér ketilbrot í eld. En þá komu systkinin Hagalín til hjálpar. Í próflestri sínum hafði ungi sagnfræðineminn rekist á mig og systur sína 10 ára gamlar á fullu að networka í DV. Sko okkur. Kannski á ég þetta enn þá til einhversstaðar?

http://timarit.is/view_page_init.jsp?issId=193789&pageId=2592366&lang=is&q=Eyrarbakka